భారత్, ఇంగ్లాండ్ మధ్య జరిగిన టీ20 సిరీస్‌ను భారత్ గెలవగా.. వన్డే సిరీస్‌ను ఆతిథ్య జట్టు గెలిచింది .  టీ20 సిరీస్‌,వన్ డే సిరీస్ లో రన్స్ చేసిన కోహ్లిని టెస్టుల్లోనూ  కట్టడి చేస్తే.. తమకు తిరుగులేదని ఇంగ్లాండ్ క్రికెట్ బోర్డు భావిస్తోంది. ఇందుకోసం ఏడాది క్రితమే టెస్టుల నుంచి వైదొలిగిన స్పిన్నర్‌ను తిరిగి లాంగ్ ఫార్మాట్లోకి రప్పించే ప్రయత్నాలు చేస్తున్నట్టుగా తెలుస్తోంది. అతడే చివరి వన్డేలో కోహ్లిని కళ్లు చెదిరే బంతితో బౌల్డ్ చేసిన అదిల్ రషీద్. ఈ ఇంగ్లిష్ స్పిన్నర్ విసిరిన బంతి అనూహ్య రీతిలో ఆఫ్ వికెట్‌ను పడగొట్టడంతో కోహ్లి నివ్వెరపోయాడు.

నమ్మలేనట్టుగా ముఖంలో భావాలను పలికించాడు. ఈ దృశ్యమే ఇంగ్లాండ్ సెలక్టర్ల మదిలో ఇంకా మెదులుతోంది కాబోలు. అందుకే అదిల్ రషీద్‌ను తిరిగి టెస్టుల్లోకి రప్పించే ప్రయత్నం చేస్తున్నారు. ఈ లెగ్ స్పిన్నర్ తో ఇంగ్లాండ్ జాతీయ సెలక్టర్ ఎడ్ స్మిత్ మంతనాలు జరుపుతున్నట్టు వార్తలు వెలువడుతున్నాయి. ఇంగ్లాండ్ జట్టులో అనుభవజ్ఞుడైన స్పిన్నర్ లేడు. దీంతో రషీద్ పునరాగమనం జట్టుకు ప్రయోజనకరమని సెలక్టర్లు భావిస్తున్నారు.

SHARE